NBA í nótt: Ofurþríeykið með 73 stig

Miami Heat komst aftur á beinu brautina í nótt með sigri á New Jersey Nets í NBA-deildinni í nótt, 101-89.

Fyrri hálfleikur var í járnum en Miami náði undirtökunum í leiknum í þriðja leikhluta sem liðið vann með 32 stigum gegn sautján.

Þríeykið öfluga, Dwyane Wade, LeBron James og Chris Bosh, var samanlagt með 73 stig í leiknum sem er það mesta sem það hefur náð á tímabilinu til þessa.

Wade var stigahæstur með 29 stig en hann hitti úr alls tíu af sautján skotum sínum utan af velli. LeBron James var með 23 stig og níu stosðendingar og Bosh með 21 stig.

Hjá New Jersey var Anthony Morrow stigahæstur með 25 stig og Brook Lopez kom næstur með tólf.

Miami tapaði óvænt fyrir New Orleans á föstudagskvöldið en sigurinn í nótt var sá fimmti í alls sjö leikjum á tímabilinu.

Þríeykið fór oft á kostum í nótt, sérstaklega Wade og James. Hér má sjá svipmyndir úr leiknum, til að mynda ótrúlega alley-oop körfu hjá James eftir sendingu frá Wade.

Portland vann Toronto, 97-84, og tapaði því síðarnefnda liðið öllum fjórum leikjum sínum á Vesturströndunni í vikunni. Brandon Roy var með 26 stig fyrir Portland og LaMarcus Aldridge var með 22 stig og tíu fráköst.

Orlando vann Charlotte, 91-88. Dwight Howard var með 22 stig og átta fráköst. Rashard Lewis bætti við öðrum 22 stigum.

Cleveland vann Washington, 107-102. Mo Williams skoraði 28 stig, þar af tíu á síðustu fjórum mínútum leiksins.

San Antonio vann Houston, 124-121, í framlengdum leik. Tony Parker var með 21 stig og fjórtán stoðsendingar, þar af sjö stig í framlengingunni. Houston hefur tapað öllum leikjum sínum á tímabilinu.

Utah vann LA Clippers, 109-107, í tvíframlengdum leik. Deron Williams skoraði 30 stig og skoraði körfuna í lok síðari framlengingarinnar sem tryggði sigurinn. Utah var mest átján stigum undir í leiknum.

New Orleans vann Milwaukee, 87-81. David West skoraði 25 stig en hann hitti úr alls tíu af tólf skotum sínum utan af velli. New Orleans er því enn ósigrað í deildinni.

Denver vann Dallas, 103-92. Carmelo Anthony skoraði 27 stig fyrir Denver en alls settu leikmenn liðsins niður 13 þrista í 21 tilraun.

Memphis vann Sacramento, 100-91. Rudy Gay skoraði 32 stig fyrir Memphis og Zach Randolpg 20.