Dirk Nowitzki áfram hjá Dallas

Dirk Nowitzki hefur skrifað undir nýjan samning við Dallas Mavericks. Þjóðverjinn fær yfir 80 milljónir dollara á fjórum árum fyrir vikið en mörg félög vildu fá hann til sín.

Ráðgjafi hans sagðist vera í skýjunum með samninginn en sá þýski var samningslaus hjá Dallas.

Nowitzki var valinn verðmætasti leikmaður deildarinnar árið 2007 og hefur verið í alls tólf ár í Dallas. Hann er 32 ára og hefur enn ekki unnið titil með félaginu.

Dallas á ekki mikla peninga eftir undir launaþakinu en vonast til að styrkja liðið í sumar. Nowitzki hefði getað fengið 96 milljónir dollara hefði hann heimtað hámarks greiðslu en í staðinn eru peningar eftir fyrir aðra.