Fulham með ótrúlegan sigur á Juventus

Raunir Juventus í vetur héldu áfram á Craven Cottage í kvöld er liðið sótti Fulham heim í Evrópudeild UEFA. Juve mætti til leiks með 3-1 forskot úr fyrri leiknum en tapaði 4-1 í kvöld og er því úr leik.

Leikurinn byrjaði frábærlega fyrir Juve því David Trezeguet kom þeim yfir á 2. mínútu. Átti þá enginn von á nokkru frá Fulham.

Lundúnaliðið gafst ekki upp og Bobby Zamora jafnaði á 9. mínútu. Fabio Cannavaro var síðan rekinn af velli í liði Juve á 27. mínútu og það opnaði glugga fyrir Fulham sem liðið nýtti í botn.

Zoltan Gera skoraði úr víti á 39. mínútu. 2-1 í hálfleik.

Gera kom Fulham síðan í 3-1 með marki á 49. mínútu. Fulham hafði engan áhuga á framlengingu og Clint Dempsey kláraði ótrúlega endurkomu liðsins með fjórða marki Fulham á 82. mínútu.

Leikmenn Juve misstu hausinn í uppbótartíma er Jonathan Zebina fékk rautt fyrir að sparka í Damien Duff. Felipe Melo gerði slíkt hið sama skömmu síðar en slapp með gult spjald.

Fulham-Juventus  4-1

Fulham áfram, 5-4, samanlagt.

Marseille-Benfica  1-2

Benfica áfram, 2-3, samanlagt.

Standard Liege-Panathinaikos  1-0

Standard áfram, 4-1, samanlagt.

Werder Bremen-Valencia  4-4

Valencia áfram með fleiri mörkum skoruðum á útivelli.