Niðursveifla hjá Buffett, verulega dregur úr hagnaði

Hagnaður Berkshire Harhaway nam 1,97 milljörðum dollara á ársfjórðungnum á móti 3,3 milljörðum dollara á sama tímabili í fyrra. Þetta hefur leitt til þess að getgátur eru uppi um hvort Buffett sé að tapa áttum á fjármálamörkuðum heimsins. Raunar er eitt af greiningarfyrirtækjunum á Wall Street búið að mæla með sölu á hlutum í Berkshire Harhaway en slík tilmæli hafa ekki komið fram síðan árið 2004.

Í umfjöllun um málið á Bloomberg fréttaveitunni segir Bill Bergman hjá Morningstar að Berkshire Harhaway hafi lent í vandræðum með afleiður og framvirka samninga á öðrum ársfjórðung og þurft að taka á sig verulegan skell í slíkum viðskiptum vegna rangra ákvarðana. Þar að auki hafi félagið tapað töluvert á viðskiptum með skuldatryggingar.

Menn eiga samt ekki að afskrifa Warren Buffett en nef hans fyrir fjárfestingartækifærum hafa gert hann að þriðja ríkasta manni heimsins. Persónulegur auður hans nemur nú tæplega 6.000 milljörðum kr.