Aquilani: Juventus getur orðið meistari

Ítalinn Alberto Aquilani hefur verið í fínu formi með Juventus í vetur en hann kom til félagsins frá Liverpool. Aquilani er fullur sjálfstrausts og telur Juve geta unnið ítalska meistaratitilinn.

"Ef Luigi del Neri talar um meistaratitilinn þá er ástæða fyrir því. Við verðum samt að taka einn leik fyrir í einu. Við erum á fínu skriði og vona það besta," sagði Aquilani en Juve kastaði reyndar frá sér unnum leik um helgina.

"Það er allt mjög jákvætt í kringum mig þessa dagana. Ég vildi koma aftur til Ítalíu og Juve gaf mér tækifærið. Vonandi er félagið ánægt með það sem félagið er að fá frá mér."