Luca Toni fer til Genoa

Luca Toni mun formlega ganga til liðs við Genoa í ítölsku úrvalsdeildinni en hann losnaði á dögunum undan samningi sínum við Bayern München.

Toni lenti saman við Louis van Gaal, stjóra Bayern, á síðasta tímabili og var lánaður til Roma eftir áramót.

Tilkynnt var á heimasíðu Genoa í dag að haldinn yrði blaðamannafundur á morgun þar sem Toni yrði formlega kynntur til sögunnar sem leikmaður liðsins.

Hann var í Þýskalandi í þrjú ár og skoraði þar 38 mörk í 60 deildarleikjum. Hann var ekki valinn í ítalska landsliðið fyrir HM í Suður-Afríku en varð heimsmeistari með liðinu í Þýskalandi fyrir fjórum árum.