Guðjón: Spiluðum ágætlega en margt má laga

„Heilt yfir spiluðum við leikinn ágætlega. Það er þó margt sem má laga og gera betur, sérstaklega þegar við förum á útivöll," sagði Guðjón Skúlason eftir öruggan sigur Keflavíkur á Snæfelli í kvöld.

Þetta var fyrsti leikur liðanna í úrslitaeinvíginu og hafa Keflvíkingar því náð forystu.

„Við náðum mjög fljótlega að setja þá út úr þeirra leik. Við hefðum þó mátt taka fleiri varnarfráköst, þeir voru að taka of mikið í sókninni. Við héldum þeim í ágætis þriggja stiga nýtingu."

„Það er oft mikið stress og erfitt að finna taktinn í fyrsta leik. En 20 stiga sigur er eitthvað sem maður getur ekki verið óánægður með. Við náðum að fylgja okkar skipulagi nokkuð vel," sagði Guðjón.

„Nú er þetta bara búið. Við tekur næsta verkefni og til þess að vinna titilinn þá þurfa menn að vinna útileik. Það er næsta verkefni," sagði Guðjón en liðin mætast næst á fimmtudagskvöld í Stykkishólmi.