NBA: Orlando sópaði út Charlotte og Milwaukee jafnaði á móti Atlanta

Þrír leikir fóru fram í fyrstu umferð úrslitakeppni NBA-deildarinnar í körfubolta í nótt og þar var lið Orlando Magic fyrsta liðið til þess að tryggja sér sæti í 2. umferð. Milwaukee Bucks náði hinsvegar að jafna sitt einvígi á móti Atlanta Hawks og Phoenix Suns komst í 3-2 á móti Portland Trail Blazers.

Vince Carter var með 21 stig og Jameer Nelson bætti við 18 stigum þegar Orlando Magic vann 99-90 sigur á Charlotte Bobcats og vann Orlando einvígið þar með 4-0. Dwight Howard var enn á ný í villuvandræðum og skoraði bara 6 stig en það kom ekki að sök fyrir Orlando.

Tyrus Thomas skoraði 21 stig fyrir Charlotte-liðið sem réð ekki við breiddina og pressuna hjá Orlando. Rashard Lewis skoraði 17 stig fyrir Orlando og Matt Barnes var með 14 stig auk þess að halda niðri Stephen Jackson sem hitti aðeins úr 2 af 11 skotum sínum.

Orlando mætir sigurvegaranum úr einvígi Atlanta Hawks og Milwaukee Bucks en þar er staðan jöfn, 2-2, eftir 111-104 sigur Milwaukee í nótt. Carlos Delfino var með 22 stig og 6 þrista fyrir Milwaukee sem vann þarna sinn annan leik í röð í einvíginu.

Brandon Jennings (23 stig) og John Salmons (22 stig) voru einnig öflugir fyrir Bucks en hjá Atlanta var Joe Johnson með 29 stig, Jamal Crawford skoraði 21 stig og Josh Smith var með 20 stig og 9 fráköst.

Channing Frye (20 stig) og Jared Dudley (19 stig) komu með sterka og jafnframt langþráða innkomu af bekknum hjá Phoenix Suns sem vann 107-88 heimasigur á Portland Trail Blazers og komst 3-2 yfir í einvíginu.

Phoenix lenti 14 stigum undir í leiknum en tókst að snúa því við og getur nú tryggt sér sæti í næstu umferð með sigri í Portland á fimmtudagskvöldið. Amare Stoudemire var með 19 stig hjá Phoenix og Steve Nash skoraði 14 stig og gaf 10 stoðsendingar. Andre Miller var með 21 stig fyrir Porland.

Úrslitin í nótt, staðan í einvíginu og næsti leikur:

Charlotte Bobcats-Orlando Magic 90-99

(Staðan er 0-4 og einvígið er búið)

Milwaukee Bucks-Atlanta Hawks 111-104

(Staðan er 2-2 og næsti leikur er i Atlanta á miðvikudag)

Phoenix Suns-Portland Trail Blazers 107-88

(Staðan er 3-2 og næsti leikur er í Portland á fimmtudag)