Ribery hættur að hugsa um Real Madrid

Franski vængmaðurinn Franck Ribery segist vera hættur að hugsa um Real Madrid og einbeitir sér nú að FC Bayern sem hann sagðist skulda á dögunum fyrir mikinn stuðning.

"Það mál er búið. Ég er afar feginn að hafa skrifað undir samning við Bayern til 2015. Mér fannst þetta alltaf vera stórt félag og hér er frábær fjölskyldustemning. Fólkið hér hefur hjálpað mér mikið," sagði Ribery sem hefur lent í hremmingum eftir að það fréttist að hann hefði keypt sér þjónustu afar ungrar vændiskonu.

"Ég veit að herra Mourinho er hrifinn af mér og hvernig ég spila. Mér fannst samt rétt að vera áfram hjá þessu félagi."

Ribery hefur skorað 42 mörk fyrir Bayern og lagt upp 49 í 116 leikjum fyrir félagið.