Bradford og Helgi Jónas spiluðu með Grindavík sem vann Hamar

Nick Bradford og Helgi Jónas Guðfinsson spiluðu báðir stórt hlutverk í 87-76 sigri Grindavíkur á Hamar í Iceland Express deild karla í Grindavík í kvöld. Nick er nýkominn til liðsins og þjálfarinn Helgi Jónas spilaði með í kvöld en hann hefur nánast ekkert verið með í vetur. Saman skoruðu þeir þrettán stig í lokaleikhlutanum þar sem Grindavík tryggði sér sigurinn með því að vinna fjórða leikhlutann 28-15.

Grindavík var fyrir leikinn búið að tapa fjórum deildarleikjum í röð og sigurinn var því langþráður hjá Helga Jónasi og lærisveinum hans. Hamarsmenn töpuðu hinsvegar í tíunda sinn í síðustu ellefu leikjum og sitja í fallsæti eftir þessa umferð.

Páll Axel Vilbergsson skoraði 21 stig fyrir Grindavík í kvöld og Ryan Pettinella var með 16 stig og 11 fráköst. Mladen Soskic skoraði 14 stig og Nick Bradford var með 11 stig og 8 stoðsendingar í sínum fyrsta leik. Helgi Jónas skoraði 10 stig en hann og Nick voru báðir bara með fjögur stig fyrir lokaleikhlutann.

Devin Antonio Sweetney skoraði 32 stig fyrir Hamar þar af 28 þeirra í fyrstu þremur leikhlutunum. Darri Hilmarsson var með 16 stig.

Grindavík var með frumkvæðið í fyrsta leikhluta og náði um tíma fimm stiga forskoti í honum en var 23-21 yfir í lok hans. Hamarsliðið var hinsvegar með þriggja stiga forskot í hálfleik, 41-38, eftir að hafa skorað sex síðustu stigin í honum.

Grindvíkingar skoruðu 9 af fyrstu 10 stigum seinni hálfleiksins og komnir ellefu stigum yfir í þriðja leikhlutanum, 46-35, þegar 4 og hálf mínúta var eftir en Hamarsmenn gáfust hinsvegar ekki upp, unnu lokakafla leikhlutans 26-13 og voru tveimur stigum yfir, 61-59, fyrir lokaleikhlutann.

Grindavík náði aftur forystu í upphafi fjórða leikhluta og nú tókst þeim að stinga Hamarsmenn af og tryggja sér ellefu stiga sigur.



Grindavík-Hamar 87-76 (23-21, 15-20, 21-20, 28-15)Stig Grindavíkur: Páll Axel Vilbergsson 21/5 fráköst, Ryan Pettinella 16/11 fráköst, Mladen Soskic 14/5 stoðsendingar, Nick Bradford 11/4 fráköst/8 stoðsendingar, Helgi Jónas Guðfinnsson 10, Ólafur Ólafsson 7, Ármann  Vilbergsson 6, Björn Steinar Brynjólfsson 2.

Stig Hamars: Devin Antonio Sweetney 32/9 fráköst, Darri Hilmarsson 16/5 fráköst, Lárus Jónsson 9/5 fráköst, Kjartan Kárason 5, Ellert Arnarson 4, Svavar Páll Pálsson 4/8 fráköst, Ragnar Á. Nathanaelsson 4/6 fráköst/4 varin skot, Snorri Þorvaldsson 2.