Hughes orðaður við þjálfarastarfið hjá FC Bayern

Leitin að arftaka Louis Van Gaal hjá FC Bayern stendur yfir þessa dagana en félagið gaf út á dögunum að Hollendingurinn myndi hætta með liðið næsta sumar.

Á meðal þeirra sem koma til greina er sagður vera Mark Hughes, stjóri Fulham. Hughes lék með félaginu leiktíðina 1987-88 og myndaði þá gott samband við Uli Höness, forseta Bayern.

Hughes þykir hafa staðið sig vel með Fulham og sú staðreynd að hann er samningslaus í lok leiktíðar er ekki til þess að draga úr sögusögnunum.

Aðrir sem hafa verið orðaðir við starfið eru Jupp Heynckes, þjálfari Bayer Leverkusen, og Matthias Sammer, fyrrum þjálfari Dortmund.