Tottenham ætlar ekki að láta Real Madrid plata sig

Tottenham-menn taka því með miklum fyrirvara að það sé einhver hætta á því að Cristiano Ronaldo missi af fyrri leik Real Madrid og Tottenham í átta liða úrslitum Meistaradeildarinnar eftir að Ronaldo fór meiddist aftan í læri um síðustu helgi.

Harry Redknapp, stjóri Tottenham, sendi aðstoðarmenn sína Tim Sherwood og Les Ferdinand til Madrid til þess að fylgjast með leik Real Madrid og Atlético Madrid í spænsku úrvalsdeildinni.

„Það leit ekki út fyrir það að hann væri meiddur aftan í læri. Þetta leit eins út og hann væri að reyna að sleppa við tvo vináttulandsleiki með Portúgal," sagði Tim Sherwood en Ronaldo var tekinn útaf á 70. mínútu eða skömmu eftir að Real komst yfir í 2-0 í leiknum.

Ronaldo mun missa af vináttulandsleikjum Portúgala á móti Síle og Finnlandi en Real Madrid spilar síðan deildarleik við Sporting Gijón áður en kemur að Tottenham-leiknum.