TV2: Vålerenga búið að bjóða í Veigar Pál

TV2 í Noregi hefur heimildir fyrir því að Vålerenga er búið að gera tilboð í Veigar Pál Gunnarsson sem hefur farið á kostum með Stabæk í norsku úrvalsdeildinni í sumar.

Tilboð Vålerenga er á milli 3 og 5 milljóna norskra króna eða á bilinu 64 til 107 milljónir íslenskra króna. Stabæk vildi þó ekki staðfesta það við blaðamann TV2 að tilboð hafi borist í leikmanninn.

Stabæk er í fjárhagskröggum og gæti því þurft að selja sinn besta leikmann. Áður hafði komið fram áhugi Rosenborg á Veigari Páli sem hefur skorað 7 mörk og gefið 4 stoðsendingar í norsku úrvalsdeildinni í sumar.

Blaðamaður TV2 heldur því fram að Vålerenga og Rosenborg séu ekki einu liðin sem eru á eftir íslenska framherjanum.