Þessi stúlka var heppin - fékk að eiga skóinn hans Usain Bolt

Jamaíkamaðurinn Usain Bolt lék listir sínar á hlaupabrautinni í Daegu í Suður-Kóreu í dag þegar hann tryggði sér sæti í úrslitum 200 metra hlaupsins en hann var vanda uppátækjasamur fyrir og eftir hlaupið.

Usain Bolt fór örugglega inn í úrslitin, stakk keppendurnar af í sínum riðli og dúllaði sér síðan í mark á að því virtist hálfrum hraða. Bolt er síðan greinilega ekki hjátrúarfullur gagnvart hlaupaskónum sínum því eftir hlaupið kastaði hann þeim upp í stúku.

Ung suður-kóresk stúlka brosti út að eyrum þegar hún var svo heppin að ná að grípa annan skóinn hans Usain Bolt þegar hann kastaði honum til áhorfenda.

Það er ekki hægt að taka það af Bolt að hann er mikill skemmtikraftur og snillingur í að ná athygli heimspressunnar. Nú er bara spurningin hvort suður-kóreska stelpan selji skóinn fyrir feita summu eða setji hann upp á hillu heima hjá sér.