Magdeburg vann með fimmtán mörkum

Magdeburg vann í dag fimmtán marka sigur á Hannover-Burgdorf í Íslendingaslag í þýsku úrvalsdeildinni í dag, 41-26.

Björgvin Páll Gústavsson sat á bekknum í dag þar sem hollenski markvörðurinn Gerrie Eijlers stóð allan tímann í marki Magdeburg.

Hannes Jón Jónsson skoraði fjögur mörk fyrir Hannover-Burgdorf í leiknum og Vignir Svavarsson tvö. Ásgeir Örn Hallgrímsson skoraði ekki að þessu sinni fyrir liðið.

Magdeburg er nú með fjórtán stig í sjötta sæti deildarinnar en Hannover-Burgdorf er í því ellefta með átta stig.