Carlos Tevez: Ég yrði ánægður að komast til Ítalíu

Carlos Tevez er spenntur fyrir því að spila með ítalska liðinu AC Milan ef marka má nýjustu yfirlýsingu umboðsmanns hans Kia Joorabchian en sá umdeildi maður var í viðtali á heimasíðunni Football Italia í dag.

Kia Joorabchian er nú staddur í Mílanó þar sem hann er að tala við forráðamenn AC Milan en ítölsku meistararnir hafa áhuga á því að fá Tevez til sín í janúar. AC Milan er að leita að manni fyrir ítalska landsliðsmanninn Antonio Cassano sem þurfti að gangast undir hjartaaðferð á dögunum og verður ekkert meira með á tímabilinu.

„Ég hef talað við Carlos og hann sagði mér að hann yrði ánægður að komast til Ítalíu. Við höfum rætt við AC Milan og stóru klúbbarnir á Ítalíu eru góður kostur í stöðunni," sagði Kia Joorabchian í viðtali á netsíðunni Football Italia. „Carlos vill spila fyrir alvöru klúbb," bætti Joorabchian við.

Carlos Tevez hefur skrópað á allar æfingar hjá Manchester City að undanförnu og heldur sig hjá fjölskyldu sinni í Argentínu. Hann heimtaði að vera seldur síðasta sumar og neitaði síðan að hita upp fyrir Meistaradeildarleik á móti Bayern München í lok september. Síðan þá hefur hann ekki æft né spilað með félögum sínum í Manchester City.