YouTube fær nýtt útlit

Google kynnti í dag nýtt útlit vefsíðunnar YouTube. Tölvurisinn vill bjóða upp á meiri tengimöguleika við samskiptasíður og bæta notendaviðmót síðunnar.

Nýja útlitið gerir notendum kleift að tengja YouTube reikning sinn við samskiptasíðurnar Facebook og Google+. Þannig munu notendur geta fylgst með því hvaða myndbönd vinir þeirra eru að horfa á.

Talsmenn Google kynntu einnig samstarf YouTube við ýmsar sjónvarpsstöðvar víðsvegar um heiminn. Þannig mun notendum síðunnar bjóðast að horfa á sjónvarpsþætti og annað efni - ásamt því að hafa aðgang að myndböndum sem framleidd eru af notendum síðunnar.