Lance Armstrong endanlega hættur

Hjólreiðakappinn Lance Armstrong hefur gefið út að hann sé nú endanlega hættur að keppa í íþróttinni.

Armstrong er 39 ára gamall og sneri aftur til keppni árið 2009 eftir þriggja ára hlé. Sex ár eru síðan hann vann Tour de France síðast en alls vann hann keppnina sjö sinnum.

Hann reyndi að vinna keppnina í áttunda skiptið en tókst ekki. Hann vildi líka afsanna í eitt skipti fyrir öll að hann hefði aldrei notað ólögleg lyf til að gefa sér forskot en lyfjanotkun hefur verið stórt vandamál í hjólreiðum.

„Ég sé ekki eftir neinu," sagði Armstrong við þetta tilefni. „Þetta hefur verið frábær reynsla en ég hélt í alvörunni að mér myndi takast að vinna Tour de France einu sinni í viðbót."

Armstrong segir að enginn íþróttamaður í sögunni hafi verið lyfjaprófaður jafn oft og hann.

Engu að síður hefur hann alltaf mátt berjast við sögusagnir og í fyrra ásakaði annar hjólreiðakappi, Floyd Landis, hann um lyfjamisnotkun og að hann hafi kennt öðrum hvernig ætti að komast hjá því að falla á lyfjaprófum.

Það mál er enn í rannsókn. „Ég get ekki stjórnað því sem fer fram í rannsókninni. Þess vegna hef ég ráðið fólk sem að hjálpar mér í svona málum. Ég reyni að láta það ekki hafa áhrif á mig. Ég veit hvað ég geri og hvað ég gerði. Það breytist ekki."