Snorri: Erum langt frá okkar besta

Snorri Steinn Guðjónsson segir að leikmenn íslenska liðsins verði að rífa sig upp þó það gangi illa þessa dagana.

"Mér líður illa. Þetta voru vonbrigði og sérstaklega að tapa á þennan hátt. Þetta var hræðilegur fyrri hálfleikur þar sem stóð ekki steinn yfir steini í okkar leik," sagði Snorri Steinn.

"Við leystum allt mjög illa og töpuðum í fyrri hálfleik. Við gefumst aldrei upp og reyndum að bjarga andlitinu í síðari hálfleik.

"Þetta var samt of mikill munur til að hægt væri að ná þeim. Það verður erfitt að rífa sig upp. Við erum langt frá okkar besta í næstu leikjum.

"Það er nýr leikur á morgun og það er mikið í húfi. Hver og einn verður að rífa sig upp. Það er ekkert annað í stöðunni."