Einar: Hræðilega spilamennska

„Ég á enginn orð til að lýsa þessari spilamennsku, en hún var hræðileg," sagði Einar Árni Jóhannsson, annar þjálfari Njarðvíkinga, eftir tapið í kvöld. Njarðvíkingar töpuðu illa fyrir KR-ingum ,71-91, í 16.umferð Iceland-Express deild karla í ljónagryfjunni í kvöld.

„Við fórum í raun með leikinn strax í fyrsta leikhluta. KR-ingar hafa verið að spila virkilega vel upp á síðkastið og þeir komu okkur í raun ekkert á óvart".

„Það er ekki víst að það sé nóg pláss í Fréttablaðinu á morgun ef við greinum hvað er að liðinu. Sóknarleikurinn okkar var virkilega slæmur og við náðum aldrei að vinna saman sem lið. Þeir hirtu nánast öll fráköstin sem voru í boði en það er virkilega dýrkeypt. Varnarlega vorum við alls ekki nægilega öflugir og þeir keyrðu bara yfir okkur," sagði Einar svekktur eftir leikinn.