Lækkuðu lánshæfismat níu evruríkja

Matsfyrirtækið Standard & Poor's lækkaði í gærkvöldi lánshæfismat níu evruríkja, þar á meðal Frakklands. Yfirmaður efnahagsmála hjá framkvæmdastjórn Evrópusambandsins gagnrýnir ákvörðun fyrirtækisins harðlega.

Matsfyrirtækið Standard & Poor's lækkaði í gær lánshæfismat Frakklands úr toppflokknum AAA niður í AA+, líkt og gert var við Bandaríkin síðasta sumar. Við það eykst enn óvissan um bata evrusvæðisins, en þróunin hafði verið nokkuð jákvæð síðustu daga og vikur. Frakkar eru þó enn með toppeinkunn frá hinum matsfyrirtækjunum, Moody's og Fitch Ratings.

Francois Baroin, fjármálaráðherra Frakklands sagði við þetta tilefni að vissulega væri um slæmar fréttir að ræða en engar hamfarir stæðu þó fyrir dyrum. Hann vísaði m.a til þess að S&P hefði lækkað einkunn Bandaríkjamanna síðasta sumars svo þetta væru engar stórslysafréttir.

Ekkert uppnám varð á mörkuðum þó að gengi hlutabréfa beggja vegna Atlantshafs hafi lækkað. Gengi evru lækkaði hins vegar og hefur ekki verið lægra í heilt ár.

Standard & Poor's lækkaði lánshæfiseinkunnir Ítalíu, Spánar, Kýpur og Portúgal, en tvö síðastnefndu löndin voru færð niður í ruslflokk. Einkunnir Austurríkis, Slóvakíu og Slóveníu voru líka lækkaðar.

Olli Rehn, yfirmaður efnahagsmála hjá framkvæmdastjórn Evrópusambandsins, gagnrýndi ákvörðun fyrirtækisins og sagði að ríkin á evrusvæðinu hefðu ráðist í afgerandi aðgerðir til að bregðast við vandanum á evrusvæðinu og mikill árangur hefði náðst í að róa fjármálamarkaði.

Ákvörðun Standard & Poor's að lækka lánshæfiseinkunnir ríkja á evrusvæðinu þýðir að það verður erfiðara fyrir ríkisstjórnir og fyrirtæki í viðkomandi löndum að afla sér lánsfjár á mörkuðum en lánveitendur nota þessar einkunnir sem mælikvarða á áhættu sem fylgir lánveitingum og halda að sér höndum ef einkunn er lág.