Bæjarar og Dortmund á sigurbraut - deila toppsætinu

Bayern München heldur toppsætinu í efstu deild þýska boltans eftir 2-0 sigur á Wolfsburg í gær. Dortmund fylgir í humátt á eftir með jafnmörg stig og Bæjarar en lélegri markamun. Liðið vann góðan 3-1 sigur á Hoffenheim.

Bæjarar þurftu að hafa heilmikið fyrir sigri sínum gegn Wolfsburg. Mario Gomez kom heimamönnum yfir í síðari hálfleik með sínu 17 marki á tímabilinu. Arjen Robben bætti öðru marki við í viðbótartíma þegar hann potaði boltanum yfir línuna eftir skot Ivica Olic.

Að sögn þýskra fjölmiðla voru heimamenn ósannfærandi í leiknum. Það er þó oft einkenni góðra liða að vinna þrátt fyrir að spila illa.

Japaninn Shinji Kagawa skoraði tvívegis í 3-1 sigri Dortmund á Hoffenheim. Dortmund fylgir því fast á hæla Bæjara með jafnmörg stig en lakari markamun.

Önnur úrslit gærdagsins

Augsburg 2-2 Kaiserslautern

Hertha Berlin 1-2 Hamburger SV

Werder Bremen 1-1 Bayer Leverkusen

Köln 1-0 Schalke