Forstjóri RBS neitaði að taka við bónusinum

Forstjóri breska bankans Royal Bank of Scotland (RBS), Stephen Hester, hefur ákveðið að þiggja ekki bónusgreiðslur upp eina milljón punda, eða sem jafngildir ríflega 190 milljónum króna, vegna rekstrarársins í fyrra. Breska ríkisútvarpið BBC greindi frá þessu í morgun.

Breska ríkið á nú 83% eignarhlut í RBS og því eru bónusgreiðslur til stjórnenda bankans umdeildar í Bretlandi, ekki síst eftir það sem á undan er gengið á fjármálamörkuðum.

Hester þykir hafa staðið sig vel sem stjórnandi bankans eftir að hann tók við stjórnartaumunum, sem var eftir þjóðnýtingu bankans að stærstum hluta á haustmánuðum 2008.

Hester ákvað að þiggja ekki bónusinn, sem átti að vera í formi hlutabréfa í bankanum, í ljósi þessa hversu umdeildar bónusgreiðslur til bankastjóra hafa verið.