Contraband rauf 10 milljarða múrinn um helgina

Tekjurnar af kvikmynd Baltasar Kormáks, Contraband, fóru nokkuð yfir 10 milljarða króna um helgina. Myndin hefur þar með borgað sig tvöfalt til baka.

Á vefsíðunni boxoffice.com má sjá að tekjurnar af Contraband eru komnar nokkuð yfir 80 milljónir dollara. Þar af eru um 13 milljónir dollara í tekjur utan Bandaríkjana en verið er að frumsýna myndina í nokkrum Evrópulöndum þessa dagana.

Contraband er enn á lista yfir vel sóttar kvikmyndir í Bandaríkjunum þrátt fyrir að margar vikur séu síðan hún var frumsýnd þar í landi. Contraband var þannig 15. mest sótta myndin í Bandaríkjunum um síðustu helgi af þeim myndum sem sýndar voru í færri en 1.000 kvikmyndahúsum.