Magnús missir ekki af oddaleiknum - kæru Stjörnunnar hafnað

Aga- og úrskurðarnefnd Körfuknattleikssambands Íslands hefur komið saman og tekið fyrir kæru sem barst eftir viðureign tvö milli Keflavíkur og Stjörnunnar í úrslitakeppni Iceland Express deild karla en leikurinn fór fram mánudaginn 2. apríl. Stjörnumenn kærðu meint viljandi olnbogaskot Magnúsar Þórs Gunnarssonar, fyrirliða Keflavíkur.

Aga- og úrskurðarnefnd hafnaði kröfu Keflavíkur um frávísun en hafnaði einnig kröfu Stjörnunnar um að Magnús Þór verði dæmdur í bann vegna atviksins. Þá var kröfu Keflavíkur um ómaksþóknun einnig hafnað.

Sjónarhorn Stjörnumanna:

"Þegar um 3 mínútur eru eftir af þriðja leikhluta í öðrum leik Keflavíkur og Stjörnunnar í 8 liða úrslitum Iceland Express deildar karla 2. apríl 2012, veitir leikmaður #10 í liði Keflavíkur, Magnús Þór Gunnarsson leikmanni #4 hjá Stjörnunni, Marvini Valdimarssyni, olnbogaskot í andlitið. Magnús hafði fengið hindrun sem Marvin elti Magnús upp úr og tók á móti boltanum úti við þriggja stiga línuna, snéri sér við (pivot) og setti þá olnbogann í andlit Marvins, en rétt er að benda á að Magnús lyftir olnboganum og sveiflar þegar hann snýr sér við. Við þetta brotnaði ein framtönn hjá Marvin uppi við rót," segir í kæru Stjörnunnar.

Sjónarhorn Keflvíkinga:

Í greinagerð Keflavíkur er atvikum svo lýst: "Þegar um þrjár mínútur eru eftir af þriðja leikhluta í öðrum leik Keflavíkur og Stjörnunnar í 8 liða úrslitum Iceland Express deildar karla 2. apríl 2012 rekur Magnús Þór Gunnarsson, leikmaður Keflavíkur, olnbogann óviljandi í andlit Marvins Valdimarssonar, leikmanns Stjörnunnar. Magnús Þór hafði fengið hindrun niður við teig sem Marvin elti Magnús Þór upp úr. Magnús Þór móttekur sendingu úti við þriggja stiga línu, snýr sér við til að koma sér í stöðu til að skjóta, senda boltann eða "dræva" upp að körfunni. Við þetta rekur Magnús Þór olnbogann óviljandi í andlit Marvins, sem hafði komið á mikilli ferða á eftir honum upp úr hindruninni, á "blindu hliðinni" og nánast ofan í hálsmálið á Magnúsi Þór. Skömmu síðar, eftir að hafa ráðfært sig við Pétur Hrafn Sigurðsson, eftirlitsdómara, dæmir Davíð Hreiðarsson, annars dómari leiksins óíþróttamannslega villu á Magnús Þór. Ekki þykir efni né ástæða til að rekja málsatvik frekar."



Það er hægt að lesa úrskurðinn í heild sinni hér.