Bayern ekki í vandræðum með Marseille

Ivica Olic skoraði bæði mörkin í 2-0 sigri Bayern München gegn Marseille í kvöld. Bæjarar tryggðu sér því sæti í undanúrslitum Meistaradeildar Evrópu með 4-0 samanlögðum sigri gegn franska liðinu.

Mario Gomez var hvíldur í kvöld, sem og Arjen Robben. Olic nýtti sér það vel og skoraði tvívegis, fyrst af stuttu færi eftir fyrirgjöf Franck Ribery snemma í leiknum og svo aftur eftir sendingu David Alaba. Toni Kroos átti þar að auki skot í stöng.

Úrslitaleikur Meistaradeildarinnar fer fram í München í vor en til þess að komast þangað þurfa Bæjarar líklega að vinna sigur á Real Madrid í undanúrslitunum. Madrídingar mæta APOEL frá Kýpur á morgun en eru í þægilegri stöðu eftir 3-0 sigur í fyrri leiknum.

Undanúrslitin fara fram síðustu tvær vikurnar í apríl.