iPhone 5 ekki fáanlegur hér landi fyrr en í lok mánaðarins

Nýr iPhone verður ekki fáanlegur á Íslandi fyrr en í lok september. Fæstir deila um fallegt útlit en tækninýjungar virðast af skornum skammti. Umboðsaðili Samsung telur blómaskeið iPhone á enda.

Ekki einn einasti iPhone 5 sími er kominn til landsins enda fer hann ekki í sölu í Bandaríkjunum fyrr en á morgun. Hann kostar þá frá um 700 dollurum sem samsvara 85 þúsund íslenskum krónum.

„Það munu líða einhverja vikur, við erum að gera okkur vonir um að hann komi til okkar í lok september," segir Hörður Ágústsson, framkvæmdastjóri Maclands.

Hægt er að forpanta símann hjá söluaðilum og verður verðið svipað og á 4s þegar hann var kynntur, frá um 160 þúsundum. Hann þykir dýr en ástæðan er helst sú að Apple dreifir ekki beint til Íslands.

„Það sem er spennandi við hann er bara enn eitt skrefið í þróuninni á iPhone. Hann breytti öllu árið 2007 og símarnir hafa tekið ótrúlegum stakkaskiptum síðan þá," segir Hörður.

Mikið af þeirri tækni sem iPhone 5 hefur framyfir forverann, er tækni sem þegar hefur verið til staðar hjá framleiðendum Android-síma, eins og Samsung.

„Það er nú ýmis tækni varðandi skjáupplausn, myndavélatækni og hvað er hægt að gera með myndavélarnar og einnig varðandi hraðinn í tækjunum," segir Sveinn Tryggvason, framkvæmdastjóri Tæknivara - umboðsaðila Samsung. Hann segir að sínu mati hafi engar nýjungar komið fram á kynningunni í gær.

Þá var einnig staðfest í gær að öllum upplýsingum um nýja símann hafði verið lekið út fyrirfram.