Margrét Lára skoraði í sigri Kristianstad

Margrét Lára Viðarsdóttir skoraði seinna mark Kristianstad í 2-0 útisigri á Umeå í sænsku kvennadeildinni í kvöld. Þetta var annar sigur Kristianstad í röð og annar leikurinn í röð þar sem Margrét Lára er á skotskónum.

Margrét Lára spilaði allan leikinn alveg eins og fyrirliðinn Sif Atladóttir en Katrín Ómarsdóttir var ekki með í kvöld. Elísabet Gunnarsdóttir þjálfar síðan liðið.

Susanne Moberg skoraði fyrra mark Kristianstad á 18. mínútu og Margrét Lára skoraði síðan seinna markið sjö mínútum fyrir hálfleik.

Kristianstad komst upp að hlið Kopparbergs/ Göteborg FC í 3. til 4. sæti en Gautaborgarliðið er bæði með betri markatölu sem og að eiga leik inni.