Ferguson: Nani er enginn leikari

Portúgalinn Nani er ekki meðal vinsælustu leikmanna ensku úrvalsdeildarinnar. Ein ástæðan fyrir óvinsældum hans er að hann þykir fara auðveldlega niður. Stjórinn hans segir þó að hann sé enginn dýfari.

"Það hefur verið vitað í mörg ár að leikmenn dýfa sér og sérstaklega eru það erlendir leikmenn sem dýfa sér. Nani er samt ekki týpan sem er með leikaraskap. Hann hefur aldrei verið þannig," sagði Sir Alex Ferguson, stjóri Man. Utd.

Argentínumaðurinn Sergio Aguero, leikmaður Man. City, kvartaði yfir því á dögunum að Englendingar nytu forréttinda hjá dómurum deildarinnar.

Nani vildi svo fá víti gegn Spurs um helgina en fékk ekki. Ferguson sagði að þar hefði átt að dæma.

Man. Utd er í eldlínunni í kvöld gegn rúmenska liðinu Cluj í Meistaradeildinni en leikurinn verður sýndur beint á Stöð 2 Sport.