Djokovic náði fram hefndum gegn Murray

Serbneski veitingahúsaeigandinn og tenniskappinn Novak Djokovic tryggði sér í gær sigurinn á Shanghai-masters mótinu í Kína. Hann lagði þá Andy Murray í þremur settum.

Þarna mættust aftur kapparnir sem kepptu til úrslita í ótrúlegum úrslitaleik á US Open. Þá hafði Murray betur en Novak náði smá hefnd í gær.

"Þetta var fínn sigur en leikurinn var rosalega jafn. Það munaði svo litlu að ég get varla sagt að ég hafi verið betri í þessum leik," sagði Djokovic.

Serbinn lét skapið hlaupa með sig í gönur í leiknum og slátraði meðal annars einum spaða í bræði sinni.

"Við erum atvinnumenn en það má ekki gleyma því að við erum líka mannlegir. Við eigum ekki að skammast okkar fyrir að sýna tilfinningar. Það er líka ekkert skemmtilegt," sagði Serbinn.