Stjörnumenn í Höllina eftir stórsigur í Hólminum

Það verða Grindavík og Stjarnan sem mætast í bikarúrslitaleiknum í körfunni í ár en þetta kom í ljós þegar Stjörnumenn burstuðu Snæfell 92-71, í undanúrslitaleik liðanna í Poweradebikar karla í Stykkishólmi í kvöld. Grindavík hafði unnið Keflavík 84-83 í hinum undanúrslitaleiknum sem fram fór í Toyota-höllinni í Keflavík fyrr í dag.

Stjörnumenn skoruðu 33 stig í fyrsta leikhlutanum, voru sextán stigum yfir í hálfleik, 54-38, og höfðu góð tök á leiknum allan tímann. Þetta verður fyrsti bikarúrslitaleikur Stjörnunnar í fjögur ár eða síðan að Stjarnan vann einn óvæntasta sigur sögunnar á KR í bikarúrslitaleiknum árið 2009.

Jarrid Frye skoraði 21 stig fyrir Stjörnuna og Justin Shouse var með 14 stig, 7 fráköst og 8 stoðsendingar. Sex leikmenn Stjörnuliðsins skoruðu 13 stig eða meira í leiknum í kvöld en aðeins Jay Threatt (16 stig) í liði Snæfells. Sigurður Þorvaldsson var reyndar með 12 stig.

Ingi Þór Steinþórsson, þjálfari Snæfells, varð því að sætta sig við að detta úr leik með bæði liðin sín í undanúrslitunum því stelpurnar töpuðu á móti Keflavík í gær.



Úrslit og stigaskor í leikjum dagsins í undanúrslitum Powerade-bikars karla:

Snæfell-Stjarnan 71-92 (25-33, 13-21, 20-18, 13-20)

Snæfell: Jay Threatt 16/6 fráköst/9 stoðsendingar, Sigurður Á. Þorvaldsson 12/5 fráköst, Hafþór Ingi Gunnarsson 10, Asim McQueen 9/8 fráköst/3 varin skot, Sveinn Arnar Davíðsson 9, Ólafur Torfason 7, Jón Ólafur Jónsson 6/4 fráköst, Pálmi Freyr Sigurgeirsson 2.

Stjarnan: Jarrid Frye 21/4 fráköst, Justin Shouse 14/7 fráköst/8 stoðsendingar, Brian Mills 14/11 fráköst, Marvin Valdimarsson 13/8 fráköst, Jovan Zdravevski 13, Fannar Freyr Helgason 13/9 fráköst, Kjartan Atli Kjartansson 3, Sæmundur Valdimarsson 1.



Keflavík-Grindavík 83-84 (18-25, 13-20, 30-21, 22-18)

Keflavík: Michael Craion 27/14 fráköst/8 varin skot, Darrel Keith Lewis 23/11 fráköst, Billy Baptist 17/7 fráköst, Valur Orri Valsson 8/6 fráköst/7 stoðsendingar, Magnús Þór Gunnarsson 6, Ragnar Gerald Albertsson 2.

Grindavík: Aaron Broussard 25/15 fráköst/5 stoðsendingar, Þorleifur Ólafsson 16, Jóhann Árni Ólafsson 15/6 fráköst, Samuel Zeglinski 12, Sigurður Gunnar Þorsteinsson 8/6 fráköst/3 varin skot, Ómar Örn Sævarsson 4/4 fráköst, Daníel G. Guðmundsson 2, Davíð Ingi Bustion 2.