Haukur í villuvandræðum í sigri Breogan

Haukur Helgi Pálsson og félagar í Breogan byrja vel í spænsku b-deildinni í körfubolta en liðið sótti tvö stig til Barcelona í morgun og vann þá öruggan 71-55 sigur á b-liði Barcelona. Breogan er eitt af fjórum liðum sem eru með fullt hús eftir tvær umferðir.

Haukur Helgi var í villuvandræðum í þessum leik en skoraði 5 stig á 11 mínútum auk þess að gefa eina stoðsendingu. Haukur hitti úr 2 af 4 skotum sínum í leiknum. Hann fékk 4 villur og það hafi örugglega mikil áhrif á að hann spilaði ekki meira.

Haukur var með 14 stig í sigri liðsins í 1. umferðinni og hefur nú sett niður 8 af fyrstu 13 skotum sínum í spænsku b-deildinni.

Breogan var með frumkvæðið allan tímann, var 25-17 yfir eftir fyrsta leikhlutann og með tólf stiga forskot í hálfleik, 42-30.