Adolf Ingi var lagður í einelti á RÚV

Við uppsagnir á RÚV vakti ekki síst athygli að Adolf Ingi Erlingsson íþróttafréttamaður var rekinn eftir 22 ára starf. Uppsögnin á sér reyndar alllangan aðdraganda.

Látinn sitja á öðrum stað

Vísir hefur talað við ýmsa sem til þekkja, fyrrverandi samstarfsmenn Adolfs Inga og fleiri, sem ekki vilja koma fram undir nafni, og öllum ber saman um að fljótlega eftir Kristín H. Hálfdánardóttir tók við stöðu íþróttastjóra deildarinnar, um 2010, hafi mjög verið að honum þrengt. Verkefnum hans fór að fækka. Adolf Ingi lýsti til að mynda fáum leikjum á HM 2010 og hann hefur ekki lýst leikjum karlalandsliðsins í handknattleik frá árinu 2010, að sögn eins heimildarmanna Vísis, og hefur það vakið athygli út fyrir veggi útvarpshússins. Síðasti keppnisleikur landsliðsins sem Adolf Ingi lýsti var bronsleikurinn 2010 þegar hann átti ógleymanlega takta við að lýsa tilþrifum Alexanders Petersson. Það er svanasöngur Adolfs Inga í þeim efnum.

Fyrir einu og hálfu ári var Adolf Ingi settur í að sjá aðeins, eða svo gott sem, um útvarpsfréttir í hádeginu og klukkan 18. Einnig var hann látinn sitja á öðrum stað en þeim þar sem íþróttadeildin hafði aðsetur.

Tilefnislitlar áminningar

Reyndar má rekja raunir Adolfs Inga innan dyra Ríkisútvarpsins allt til þeirra láta sem urðu þegar Auðun Georg Ólafsson var ráðinn sem fréttastjóri, en því mótmæltu starfsmenn hástöfum. Þá skrifaði Adolf Ingi harðorða grein sem birtist í Fréttablaðinu, grein sem flestir starfsmenn Ríkisútvarpsins voru sammála efnislega en eftir þetta virðist sem Adolf Ingi hafi fallið í ónáð hjá yfirstjórn stofnunarinnar.

Heimildarmenn Vísis tala um áminningar sem Adolf Ingi fékk og að tilefnislitlu. Það var verið að leita að átyllu til að reka hann, að því er virðist. Hann var með gamla ríkissamninginn. Sem hann skrifaði undir 1992. Hann féll ekki undir þetta ohf-fyrirkomulag og fól í sér meira starfsöryggi; ekki var ekki hægt að segja honum upp án ástæðu. Nú telja lögfræðingar að svo langt sé um liðið frá ohf-væðingu stofnunarinnar og RÚV sé óbundið af þeim samningum, svo sem er varða uppsagnafrest.

Um vorið 2011 fór Adolf Ingi með þessi mál sín til mannauðsstjóra en þar var umkvörtunum snúið á haus og var Adolf Ingi látinn í kjölfarið skrifa undir yfirlýsingu þar sem hann hét því að breyta sínum vinnubrögðum og framkomu. Eftir þetta atvik versnaði ástandið enn.

Adolf Ingi Erlingsson vildi ekki tjá sig um málið, þegar eftir því var leitað: „No comment!“

Tjáir sig ekki

Kristín kom í starf yfirmanns íþróttadeildar ríkisútvarpsins af fjórðu hæðinni, þar sem fjármáladeildin hefur aðsetur. Þar var hún bókari og mun það hafa þótt góð hugmynd að fá hana því fæstar fjárhagsáætlanir íþróttadeildarinnar höfðu gengið eftir. En, ekki er vitað til þess að Kristín hafi haft reynslu af stjórnun eða nokkra sérstaka þekkingu á íþróttamálum.

Adolf Ingi átti mjög erfitt uppdráttar og það ástand versnaði, segir einn fyrrum samstarfsmaður Adolfs Inga; hann var ótrúlega duglegur og gott að vinna með honum en aðstæður hans breyttust mjög þegar Kristín tók við deildinni.

Kristín segir þetta forvitnilegar útleggingar þegar leitað var eftir viðbrögðum hennar en hún segist ekki tjá sig um málefni einstakra starfsmanna. Þegar henni var bent á að Adolf Ingi væri ekki lengur starfsmaður sagði Kristín að þetta varðaði engu að síður málefni Adolfs meðan hann var starfsmaður. Og vildi ekki láta hafa neitt umfram það um málið, jafnvel þó um alvarlegar ásakanir sé að ræða.