Hjörtur Hrafn skaut aldrei á körfuna en hafði mikil áhrif

Njarðvíkingurinn Hjörtur Hrafn Einarsson fékk hrós frá þjálfara sínum eftir sigurinn á ÍR í í Seljaskóla í kvöld en Njarðvíkingar enduðu þá þriggja leikja taphrinu sína með öruggum 95-72 sigri.

Hjörtur Hrafn lék samt bara í rúmar fimmtán mínútur í leiknum og skaut aldrei á körfuna. Áhrif hans á leikinn sjást hinsvegar í plús og mínus en Einar Árni Jóhannsson, þjálfari Njarðvíkur, hrósaði Hirti réttilega fyrir varnarleikinn sem hann spilaði í leiknum í kvöld.

Njarðvikurliðið vann þær 15 mínútur og 12 sekúndur sem Hjörtur Hrafn spilaði 50-16 eða með 34 stiga mun. Það þýðir að þær 24 mínútur og 48 sekúndur sem Hjörtur Hrafn sat á bekknum tapaði Njarðvíkur liðið, 45-56, eða með 11 stiga mun.

Hjörtur breytti leiknum þegar hann kom inná í fyrri hálfleiknum en ÍR-liðið skoraði þá bara 11 stig á þeim rétt rúmu 11 mínútum sem hann spilaði í hálfleiknum. Njarðvíkurliðið vann þann kafla í fyrri hálfleiknum 37-11.

Hjörtur Hrafn inn á vellinum í kvöld:

15 mínútur, 12 sekúndur

Njarðvík 50 stig

ÍR 16 stig

Nettómunur: Njarðvík +34

(Hjörtur Hrafn var með 0 stig, 3 fráköst, 1 stoðsendingu og 1 varið skot)

Hjörtur Hrafn á bekknum í kvöld:

24 mínútur, 48 sekúndur

Njarðvík 45 stig

ÍR 56 stig

Nettómunur: ÍR +11