Í öngum sínum eftir tapið á Ís­landi: „Eitt neyðar­legasta tap í sögu þjóðarinnar“

Í Delfi, einum vinsælasta miðli Litáens, er gærkvöldinu lýst sem hreinni martröð. „Litáíska karlalandsliðið mátti þola eitt neyðarlegasta tap í körfuboltasögu þjóðarinnar,“ segir í grein miðilsins.

Í rökstuðningi segir að Ísland hafi til að mynda verið án eins af þeim þremur leikmönnum liðsins sem spili á að minnsta kosti sæmilegu stigi með sínu félagsliði, og er þar vísað til meiðsla Martins Hermannssonar.

Þjálfari Litáens, Rimas Kurtinaitis, sagði hins vegar ekki um neina katastrófu að ræða. Liðið hefði gert sín mistök en spilað vel – Ísland hefði bara spilað betur.

Aðspurður á körfuboltamiðlinum krepsinis.net hvort það væri samt ekki áfall að tapa „fyrir svona lítilli körfuboltaþjóð“ svaraði þjálfarinn neitandi. Hann benti á að Ísland væri ekki án leikmanna vegna Euroleague og að fleiri þjóðir lentu í vandræðum gegn Íslendingum, eins og til dæmis Ítalía sem tapaði fyrir Íslandi fyrr í keppninni.

Þá benti Kurtinaitis á árangurinn sem Ísland hefði áður náð í fótbolta og að sömu einkenni væru að nýtast liðinu núna. Víkingakarakterinn. Hann gæti ekkert kvartað yfir sínu liði í gær.

Á öðrum litáískum körfuboltamiðli, basketnews.lt, segir að „fíaskóið“ á Íslandi breyti plönum hjá Kurtinaitis og hans liði. Nú verði enn meiri pressa lögð á Zalgiris, stæsta félagslið landsins og eitt af liðunum í einkadeildinni Euroleague, að láta frá sér leikmenn fyrir heimaleikinn við Ísland á mánudaginn.

Samkomulag hafi til að mynda verið við Zalgiris um að Azuolas Tubelis myndi bara spila annan leikjanna við Ísland en það verði nú endurskoðað. Hann skoraði 16 stig í gær. Ignas Brazdeikis og Mantas Rubstavicius, liðsfélagar hans úr Zalgiris, spiluðu einnig í gær.

Basketnews segir líka í fyrirsögn að tapið í gær sé óafsakanlegt en hefur eftir Ramunas Siskauskas, sem var í Evrópumeistaraliðinu 2003, að líklega hafi menn haldið að sigurinn væri í höfn:

„Það er erfitt að segja til um það utan frá en kannski var liðið byrjað að fagna sigrinum of snemma. Kannski vildu þeir bara að leikurinn yrði flautaður af og voru bara að bíða eftir því,“ sagði Siskauskas.