Arbeloa hættur með landsliðinu

Alvaro Arbeloa, bakvörður Real Madrid, ætlar ekki að gefa kost á sér í spænska landsliðið á nýjan leik.

Landsliðsferill Arbeloa hófst árið 2008 og varð hann tvívegis Evrópumeistari með Spánverjum og einu sinni heimsmeistari.

Hann er 31 árs gamall og spilaði minna með Real Madrid á nýliðinni leiktíð en á undanförnum árum. Meiðsli settu strik í reikninginn og var hann ekki valinn í HM-hóp Spánverja fyrir keppnina í Brasilíu í sumar.

„Nú er minn tími með landsliðinu liðinn. Ég ræddi við Vincente Del Bosque [landsliðsþjálfara] því hann hringdi þegar ég meiddist,“ sagði Arbeloa við spænska fjölmiðla.

„Þetta kemur því ekki við að ég var ekki valinn í hópinn. Það var ákvörðun þjálfarans. Ég hafði þegar tekið þessa ákvörðun og óska landsliðinu alls hins besta. Ég vona að þeir verði heimsmeistarar,“ sagði Arbeloa og bætti við að hann ætlaði sér að spila áfram með Real Madrid.