Soffía og félagar réðu ekkert við Melis og útlitið er svart

Hollenski framherjinn Manon Melis skoraði fernu á fyrstu tuttugu mínútunum þegar Kopparbergs/Göteborg vann 4-0 útisigur á Soffíu Gunnarsdóttur og félögum í Jitex í sænsku úrvalsdeildinni í fótbolta í kvöld.

Soffía Arnþrúður Gunnarsdóttir var í byrjunarliði Jitex og spilaði allan leikinn á vinstri vængnum.

Úrslitin voru ráðin eftir tuttugu mínútna leik en Melis skoraði mörkin sín á 5., 7., 15. og 20. mínútu leiksins.

Kopparbergs/ Göteborg FC er í 3. sæti deildarinnar, sex stigum á eftir toppliði FC Rosengård en Soffía og félagar í Jitex Mölndal BK eru í neðsta sætinu og hafa ekki enn fengið stig.

Þetta eru mikil viðbrigði fyrir Soffíu sem vann alla 18 deildarleikina með Stjörnunni í fyrrasumar en hefur nú verið í tapliði í öllum deildarleikjum sínum í Svíþjóð.