Líklegast að Geir fari til Washington og Árni til Moskvu

Gunnar Bragi Sveinsson, utanríkisráðherra, hefur skipað Geir H. Haarde, fyrrverandi forsætisráðherra, og Árna Þór Sigurðsson, alþingismann Vinstri grænna, sem sendiherra í utanríkisþjónustunni. Eins og fram kom í gær veitir utanríkisráðuneytið ekki upplýsingar um það í hvaða sendiráði þeir muni starfa fyrr en gistiríki þeirra hafa samþykki þá.

Samkvæmt heimildum Vísis þykir líklegast að Geir H. Haarde verði sendiherra Íslands í Washington en hann mun lengi hafa haft áhuga á sendiherrastöðunni í Washington og hefur ráðning hans verið í undirbúningi undanfarið ár eða svo. Þá þykir líklegt að Árni Þór Sigurðsson verði sendiherra Íslands í Moskvu. Sú staða muni henta vel, en Árni stundaði nám í slavneskum málvísindum við Moskvuháskóla á árunum 1986-1988 og hefur góða rússneskukunnáttu.

Núverandi sendiherra Íslands í Washington er Guðmundur Árni Stefánsson og núverandi sendiherra Íslands í Moskvu er Albert Jónsson. Samkvæmt upplýsingum frá utanríkisráðuneytinu er algengast að sendiherrar þjóni í um 3-5 ár á hverjum stað, þótt ekki séu til fastmótaðar reglur um það.

Bæði Albert Jónsson og Guðmundur Árni Stefánsson voru skipaðir haustið 2011 og munu því hafa gegnt stöðum sínum í rúm 3 ár um áramótin þegar skipanir Geirs og Árna Þórs taka gildi.