Átta ára barn lést eftir að hafa fengið pökk í höfuðið

Íbúar í bænum Dunkirk í Frakklandi eru í áfalli eftir að átta ára drengur lést á hokkíleik í bænum.

Í þriðja leikhluta á leik Dunkirk og Reims í 1. deildinni skaust pökkurinn upp í stúku og beint í eyrað á Hugo Vermeersch.

Hann fór í kjölfarið í hjartastopp og þrátt fyrir björgunaraðgerðir lést hann á spítala síðar í gær.

Rannsókn er hafin á dauðsfallinu en völlurinn er ekki allur með hlífðargleri sem fólk þekkir af hokkíleikjum. Vermeersch sat á svæði þar sem ekkert gler var til að varna pekkinum frá því að fara upp í stúku.