Snjómokstur gengið hægar en vanalega í Reykjavík

Starfsmenn Reykjavíkurborgar hafa verið úti síðan klukkan 4 í nótt við snjóhreinsun og söltun. Fyrir klukkan 8 í morgun var búið að ryðja allar stofnbrautir og helstu hjólreiðaleiðir en hreinsun gekk hægar en vanalega þar sem snjórinn er þungur í sér.

Verið er að vinna í að ryðja húsagötur núna og verður haldið áfram í því í allan dag, að sögn Jóns Halldórs Jónassonar, upplýsingafulltrúa hjá Reykjavíkurborg.

Þá bendir hann á að íbúar geti komið ábendingum áleiðis til borgarinnar í gegnum vefinn, til dæmis um lélegan snjómokstur. Ábendingavefinn má finna hér.

Samkvæmt upplýsingum frá lögreglu hefur umferðin gengið vel fyrir sig það sem af er degi.