Þessar tölur eru ekkert til að tala um

Hinn 23 ára Einar Daði Lárusson hefur verið lengi frá keppni vegna meiðsla í hásin en tók loksins þátt í sínu fyrsta fjölþrautarmóti nú um helgina – eftir átján mánaða bið. Hann varð þá hlutskarpastur í sjöþraut á Meistaramóti Íslands í fjölþrautum innanhúss er hann hlaut 5.494 stig og náði sinni næstbestu sjöþraut frá upphafi.

„Þessar tölur eru reyndar ekkert til að tala um,“ sagði hann af mikilli hógværð í samtali við Fréttablaðið í gær. „Það var fyrst og fremst mikilvægt fyrir mig að klára þrautina og finna að það sé í lagi með mig. Það segir mér að ég geti nú byrjað að æfa betur,“ bætir Einar Daði við en hann hefur verið að glíma við erfið meiðsli í hásin.

Hann segir erfitt að gera sér grein fyrir því fyllilega af hverju hann hafi verið svo lengi að ná sér. Hásinin slitnaði ekki en Einar Daði fann lengi fyrir eymslum í festunni við hælbeinið.

„Líklega voru mistök að hlífa ekki svæðinu algjörlega fyrst eftir meiðslin og hætta öllum æfingum. En þess utan veit ég ekki af hverju þetta tók svona langan tíma,“ segir Einar Daði sem ákvað loks að taka sér algjört frí frá æfingum síðastliðið sumar.

„Til að byrja með vann ég mikið í efri skrokknum og styrkti mig mikið þar. En síðasta sumar gat ég einfaldlega ekkert æft. Það var ekki séns. Þá hvíldi ég algjörlega og tel að það hafi verið gott fyrir mig. Meiðslin voru áfram að há mér við æfingar í haust en ég fann að eymslin urðu alltaf minni og minni.“

Einar Daði tók sér svo tveggja vikna hvíld fyrir mótið um helgina og fann ekkert fyrir meiðslunum. „Ég var bara orðinn þreyttur undir lokin enda ekki klárað heila þraut í mjög langan tíma. Það var bara svo gott að finna gamla neistann aftur því það er svo ótrúlega gaman að keppa. Það gerði mér afskaplega gott að hafa klárað heila þraut.“

Ætla ekki að setja pressu á mig

Aðeins Jón Arnar Magnússon hefur náð betri tugþraut en Einar Daði sem náði sínum besta árangri á móti í Tékklandi í júní árið 2012. Þá náði hann 7.898 stigum en árangurinn þýddi að hann rauk upp heims- og Evrópulistann í greininni.

Meiðslin settu hins vegar stórt strik í reikninginn og kostuðu Einar Daða allt síðasta keppnistímabil. Engu að síður ætlar hann að flýta sér hægt í endurkomunni.

„Planið er að æfa eins vel og ég get án þess að eiga það á hættu að meiðslin taki sig upp. Ég vil ekki setja þá pressu á mig að standa mig svakalega vel í sumar. Ég ætla frekar að horfa til næsta árs og næstu ára,“ segir hann og bætir við að það verði einfaldlega að koma í ljóst hvort hann geti tekið þátt á EM í Zürich næsta sumar.

„Ég vil frekar æfa af skynsemi og sjá til. Ég veit að ef ég næ að æfa almennilega og halda mér líkamanum heilum munu góðir hlutir gerast.“