Vildi hasar og ég fékk hasar

„Ég þurfti aðeins að vinna fyrir kaupinu í dag enda var þetta þvílíkur iðnaðarleikur,“ segir Brynjar Gauti Guðjónsson en hann átti frábæran leik í vörn Íslands gegn Dönum í Álaborg í gær.

Hann og Sverrir Ingi Ingason stönguðu óteljandi bolta frá íslenska markinu í gær og blaðamaður væri ekki hissa ef þeir hefðu verið með hausverk eftir leikinn.

„Fyrir mig sem varnarmann þá eru þetta skemmtilegustu leikirnir. Maður vill að sjálfsögðu hafa hasar í þessu og ég fékk þann hasar í dag. Við vorum að spila við gríðarlega sterkt danskt lið og náðum að halda vel aftur af því. Við erum heldur betur inni í þessu einvígi og það getur allt gerst.“

Það var smá hroki í Dönunum fyrir leikinn og þeir ætluðu sér að klára einvígið í þessum leik.

„Það pumpaði okkur upp að sjá að þeir héldu að það þyrfti ekkert að hafa fyrir hlutunum. Við fórum með það að markmiði í leikinn að berja aðeins á þeim og ná þeim niður á jörðina. Þetta eru gríðarlega góð úrslit. Við gætum mætt þeim í 20 metrum á sekúndu og snjókomu á heimavelli og þá getur allt gerst.“