Vignir: Vissi ekki að Frakkland væri næst

Vignir Svavarsson fékk fyrstur íslensku leikmannanna að líta rauða spjaldið fyrir þrjár brottvísanir í leik á HM í handbolta.

Vigni var vísað af velli er Ísland vann Alsír í fyrrakvöld en dómarar þess leiks tóku strangt á ákveðnum þáttum í varnarleik liðanna líkt og dómarar annarra leikjanna í keppninni til þessa.

Hann segist ekki hafa velt því fyrir sér hvort að um nýja áherslu sé að ræða hjá dómurum sem erfitt sé fyrir leikmenn að átta sig á í upphafi keppninnar.

„Við höfum ekkert rætt um þetta okkar á milli en mér finnst reyndar dómararnir alltaf dæma á móti mér,“ segir Vignir og hló.

„Ég hef ekki skoðað fyrir hvað ég fékk þessar brottvísanir. Mér fannst það vera fyrir litlar sakir í að minnsta kosti eitt skipti. En þetta er eitthvað sem ég spái mikið í - þetta er bara svona í þessari íþrótt.“

Þetta er ekki í fyrsta sinn sem dómarar taka fast á ákveðnum þáttum í upphafi stórmóta og hafa brottvísanir verið afar áberandi á HM í Katar til þessa.

„Það kemur oft áherslubreyting í dómgæslunni fyrir stórmót. Stundum er það ruðningur eða eitthvað sem er ákveðið á hverjum tíma. Svo koma dómararnir víða að og hafa því sínar áherslur sem allar koma saman á einum stað á móti sem þessu.“

Guðmundur Guðmundsson, þjálfari danska landsliðsins, segir að dómgæslan eins og hún hafi verið á mótinu geti haft mikil áhrif á útkomu leikjanna. „Því er nú verr og miður í þessari íþrótt að getur oft gerst. Ég efast samt ekki um að þessir dómarar séu að gera sitt besta og að fara eftir reglunum eins vel og þeir geta.“

Ísland mætir Frakklandi á HM í Katar í kvöld og Vignir segir að það sé von á allt öðruvísi leik en gegn Alsír í fyrradag. „Frakkar eru í allt öðrum gæðaflokki enda með marga frábæra leikmenn og vel spilandi lið. En við gerum allt sem við getum til að stöðva þá og nýta okkur veikleika í þeirra sóknarleik.“

Hann segist ekkert hafa velt fyrir sér hversu mikilvægur leikurinn er upp á áframhaldandi þátttöku Íslands í keppninni og áhrif úrslits hans á mögulega andstæðinga í 16-liða úrslitum, komist Ísland þangað.

„Ég spái voða lítið í þessu og vissi satt besta að segja í gær [í fyrradag] að við værum að fara að spila við Frakka næst. Maður verður svolítið súr ef maður ætlar að hugsa svona hluti langt fram í tímann í svo löngu móti og ekki eitthvað sem ég spái ekki mikið í.“

Ekki missa af neinu sem gerist á HM. Fylgdu Vísi á Twitter, Facebook og Snapchat (notendanafn: sport365).