Spánverjar í vandræðum með Brasilíu | Gajic skoraði 15 mörk

Heimsmeistarar Spánverja unnu torsóttan tveggja marka sigur, 27-29, á Brasilíu í A-riðli á HM í handbolta í Katar í dag. Spánn er með fullt hús stiga eftir tvo leiki en liðið lagði Hvíta-Rússland að velli í gær.

Brasilíumenn, sem töpuðu fyrir Katar í opnunarleik mótsins, héldu í við Spánverja í fyrri hálfleik en staðan að honum loknum var 14-15.

Cesar Almeida, markvörður Brasilíu, var í miklu stuði í fyrri hálfleik og varði 13 skot, en botninn datt algjörlega úr sóknarleik Spánverja seinni hluta hálfleiksins.

Brassarnir héldu áfram að þjarma að Spánverjum í seinni hálfleik og náðu loks að jafna í 18-18 þegar Felipe Ribero skoraði eftir hraðaupphlaup. Skömmu síðar komust Brasilíumenn yfir, 19-18, eftir annað hraðaupphlaupsmark frá Joao Silva.

En um miðjan seinni hálfleik sprungu Brasilíumenn á limminu. Spánn breytti stöðunni úr 23-23 í 25-29 og heimsmeistararnir unnu að lokum tveggja marka sigur, 27-29.

Joan Canellas var markahæstur í liði Spánar með átta mörk, en Valero Rivera kom næstur með sjö. Þá átti José Manuel Sierra flottan leik í markinu en hann varði um 20 skot.

Ribero og Guilherme de Toledo skoruðu fimm mörk hvor fyrir Brasilíu.

Slóvenar áttu ekki í miklum vandræðum með að leggja Hvíta-Rússlandi að velli í sama riðli.

Slóvenar voru níu mörkum yfir í hálfleik, 8-17, og þann mun náðu Hvít-Rússar aldrei að brúa. Lokatölur 29-34, Slóvenum í vil sem eru með fullt hús stiga eftir tvo leiki líkt og Spánverjar.

Dragan Gajic, hornamaðurinn frábæri, skoraði 15 mörk fyrir Slóveníu en hann hefur farið mikinn í upphafi móts og skoraði níu mörk í sigrinum á Chile í gær.

Maxim Babichev skoraði fimm mörk fyrir Hvít-Rússa sem eru enn án stiga.