Leikur KR og Tindastóls verður á mánudagskvöldið

Körfuknattleiksamband Íslands hefur ákveðið leikdaga og leiktíma í undanúrslitum Poweradebikars karla og kvenna sem fara fram um næstu helgi en þar verður keppt um sæti í bikarúrslitaleikjunum sem verða 21. febrúar næstkomandi.

Tvö efstu liðin í Dominos-deildunum mætast í bæði karla- og kvennaflokki og þeir gerast því varla stærri bikarleikirnir nú þegar farseðill í Laugardalshöllina er í boði.

Keflavík tekur á móti toppliði Snæfells í Poweradebikar kvenna klukkan 16.30 á laugardaginn en leikur Grindavíkur og Njarðvíkur fer fram í Grindavík klukkan 19.15 á mánudagskvöldið 2. febrúar.

Skallagrímur fær Stjörnuna í heimsókn í Poweradebikar karla klukkan 19.15 á sunnudagskvöldið en sólarhring síðar tekur topplið KR á móti spútnikliði Tindastóls í Frostaskjólinu.

Tindastólsmenn urðu fyrstir til að vinna KR-inga á dögunum en sá leikur fór fram í Síkinu á Sauðárkróki. Fyrr í vetur þurfti KR framlengingu til að vinna Stólanna í DHL-höllinni og það er von á spennandi leik á mánudagskvöldið.

Undanúrslit Poweradebikarsins í ár:

Powerade-bikar kvenna:

Keflavík-Snæfell 31. janúar klukkan 16.30

Grindavík-Njarðvík 2. febrúar klukkan 19.15

Powerade-bikar karla:

Skallagrímur-Stjarnan 1. febrúar klukkan 19.15

KR-Tindastóll 2. febrúar klukkan 19.15