Khedira fer frá Real í sumar

Þýski landsliðsmaðurinn Sami Khedira hefur staðfest að hann muni fara frá Real Madrid þegar samningur hans við félagið rennur út í sumar.

Khedira er á fimm ára samningi við Real en þessi 27 ára kappi hefur ekki gefið upp hvert hann vilji halda næst.

„Ég er ekki með samkomulag við neitt félag og það er ekki eitthvað ákveðið félag sem ég vil fara til,“ sagði Khedira í samtali við þýska blaðið Kicker.

„Ég hef ekkert slæmt um Real Madrid að segja. Ég vil takast á við nýjar áskoranir og halda áfram að vaxa sem leikmaður.“

Khedira er frjálst að ræða við önnur félög og Schalke staðfesti á dögunum viðræður við hann. Þá eru Bayern München, Chelsea og Arsenal einnig sögð áhugasöm.

Hann varð bæði Spánar og Evrópumeistari með Real Madrid en Khedira fagnaði einnig heimsmeistaratitlinum með Þýskalandi síðastliðið sumar.

„Þetta var frábær tími í frábæru liði. Ég mun gera allt sem ég get til að hjálpa liðinu á næstu vikum,“ sagði Sami Khedira.