Rand Paul býður sig fram til forseta

Bandaríski öldungadeildarþingmaðurinn Rand Paul tilkynnti fyrr í dag að hann byði sig fram til að verða frambjóðandi Repúblikana í bandarísku forsetakosningunum á næsta ári.

Í tilkynningu á heimasíðu sinni sagðist hann ætla að berjast fyrir frelsi og takmörkuðum ríkisafskiptum.

Paul er öldungadeildarþingmaður Kentucky og er annar Repúblikaninn til að tilkynna um framboð sitt. Ted Cruz, öldungadeildarþingmaður Texas-ríkis, greindi frá sínu framboði í síðasta mánuði.

Paul var kjörinn á þing árið 2010 þegar Teboðshreyfingin svokallaða naut talsverðra vinsælda í bandarískum stjórnmálum.

Paul er menntaður augnlæknir og þykir íhaldssamur þegar kemur að hjónaböndum samkynhneigðra og fóstureyðingar. Þá þykir mörgum hann vera mikinn einangrunarsinna í utanríkismálum.