Eldur í Skeifunni

Slökkviliðið á höfuðborgarsvæðinu var kallað út nú fyrir stundu eftir að tilkynning barst um eldsvoða í Skeifunni 9, eða við Bílaleigu Akureyrar. Umfang eldsins er enn óljóst og upptök hans ókunn.

Slökkviliðið er á vettvangi og verður fréttin uppfærð eftir því sem frekari upplýsingar berast.

Uppfært 15.26:

Eldurinn kviknaði í Bílaleigu Akureyrar sem stendur við hliðina á svæðinu þar sem eldurinn í Fönn kviknaði fyrir ári. Samkvæmt upplýsingum frá starfsmanni bílaleigunnar kviknaði eldurinn á efri hæð hússins en enn eru upptök hans ókunn.

Starfsmenn höfðu ekki teljandi áhyggjur og töldu slökkviliðsmönnum hafa tekist að ráða niðurlögum eldsins.

Uppfært 15.46:

Eldurinn kviknaði í þakpappa út frá logsuðu en smiðir voru að vinnu á efri hæð hússins.