Hannes fær ókeypis þrif á húsinu standi Ísland sig gegn Hollandi

Landsliðsmarkvörðurinn Hannes Þór Halldórsson segir Hollendinga reikna með auðveldum sigri gegn Íslandi. Hannes Þór gekk til liðs við hollenska félagið NEC Nijmegen í sumar frá norska félaginu Sandnes Ulf og líkar vel veran í Hollandi.

„Núna tók maður bara lest í klukkutíma og kominn á hótelið,“ segir markvörðurinn um ferðalagið í þetta tiltekna landsliðsverkefni. Hann segist rosalega ánægður með lífið í Hollandi.

„Þetta er svakalegt skref upp á við. Að koma úr norsku annarri deidlinni og spila núna á fullum 20 þúsund manna völlum í Hollandi. Leikurinn er miklu hraðari og það er geggjað fyrir mig að ná að taka þetta skref, vera kominn á þennan aldur og ná að gera meira úr ferlinum.“

Hannes býr með konu og barni í Hollandi og segir öllum líða vel. Félagið sé flott og allt „prima“ eins og Hollendingurinn segir. Félagar hans í hollenska liðinu eru kokhraustir í aðdraganda leiksins en þó ekki sáttir með eigið landlsið.

Ókeypis þrif í húfi

„Þeir tala ekki fallega um liðið en segjast þó munu rúlla yfir okkur. Menn búast við öruggum sigri,“ segir Hannes sem gerði eitt veðmál fyrir leikinn. Engir peningar eru þó í húfi.

„Það er gæi í liðinu sem er team manager, sér um allt, og hann fullyrðir að Holland muni stúta okkur. Hann ætlar að þrífa allt húsið mitt ef Holland vinnur okkur ekki. Hann er það sigurviss,“ segir Hannes Þór. Hann upplifi það sem stemninguna í Hollandi. Heimamenn muni vinna sem er skiljanlegt sjónarmið enda gerist leikirnir ekki mikið erfiðari en gegn Hollandi úti.

„Auðvitað þarf allt að ganga upp hjá okkur og við þurfum heppni. En við höfum spilað vel í langan tíma og erum með stöðugleika í okkar leik. Við getum því farið inn í leikinn og reiknað með því að við verðum þéttir, gefum ekki færi á okkur og eigum alltaf séns á því að stela einhverju. Við munum taka öllum úrslitum öðrum en tapi og vera sáttir með þau,“ segir markvörðurinn. Jafntefli væru fín úrslit, þau gefi okkur meira en Hollendingunum en liðið muni þó ekki spila upp á það. Það sé ekki vænlegt til árangurs.

Reyni að fljúga hvorki of hátt né lágt

„Við þurfum að hitta á daginn okkar og djöflast sem aldrei fyrr. Vonandi fellur þetta fyrir okkur og við göngum sáttir af velli.“

Aðspurður um eigið sjálfstraust segist Hannes vera í góðu jafnvægi.

„Ég reyni ekki að vera að tapa mér þegar gengur vel eða illa, að sökkva of djúpt eða fljúga of hátt. Maður verður að einangra þetta niður í hvern leik og hvert móment, trúa á stöðguleikann,“ segir Hannes. Hann sé búinn að spila erfiða leiki undanfarið og gengið vel.

„Ég er á mjög góðum stað og hef ekki yfir neinu að kvarta.“