Velgengni Martial kemur þjálfara og fyrirliða Monaco ekkert á óvart

Anthony Martial, Frakkinn ungi sem Manchester United keypti frá Monaco fyrir fúlgur fjár, hefur farið frábærlega af stað með liðinu og skorað fjögur mörk í sex leikjum.

Hann komst nálægt því að skora fyrir United í gærkvöldi þegar liðið vann sinn fyrsta Meistaradeildarleik á leiktíðinni á móti Wolfsburg á heimavelli.

Martial sló í gegn strax í fyrsta leik með því að skora glæsilegt mark á móti Liverpool, en mörgum hefur komið á óvart hversu fljótur hann var að koma sér inn í liðið hjá United. Ekki fyrirliða Monaco.

„Þetta kemur mér ekkert á óvart. Anthony er virkilega hæfileikaríkur,“ segir Jérémy Toulalan, fyrirliði Monaco.

„Hann er góður strákur sem á eftir að slá í gegn í Manchester. Það var erfitt fyrir hann að hafna tilboði sem þessu. Ég er ánægður fyrir hans hönd.“

Martial kom til Monaco frá Lyon og skoraði 15 mörk í 70 leikjum áður en hann var keyptur til Manchester United.

Leonardo Jardim, þjálfara Monaco, kemur velgengni stráksins unga heldur ekkert á óvart frekar en fyrirliða Monaco-liðsins.

„Hann er bara virkilega góður, ungur leikmaður. Þegar menn eru í góðum liðum eins og Monaco þar sem unnið er með þig er auðvelt að bæta sig og síðan fara til liðs eins og Manchester United,“ segir Leonardo Jardim.